د معمار خبري آژانس د راپور له مخې؛ د ملګرو ملتونو د بشري مرستو د همغږۍ دفتر (اوچا) اعلان کړی چې په اوسط ډول هره میاشت شاوخوا ۵۰ کسان په افغانستان کې د ناچاودېدلو مهماتو د چاودنو له امله وژل کېږي یا ټپیان کېږي. د دې ادارې په وینا، نږدې ۸۰ سلنه د دغو پېښو قربانیان ماشومان جوړوي.
اوچا د سې شنبې په ورځ د یوې ویډیو په خپرولو سره ټینګار کړی چې د افغانستان وګړي باید وکولای سي په امن کې او د پټو چاودېدونکو توکو له وېرې پرته خپل ژوند ته دوام ورکړي.
دې ادارې خبرداری ورکړی چې د ماین پاکۍ او د ناچاودېدلو مهماتو د پاکولو پروګرامونه، چې د ملکي وګړو د ژوند په ساتنه کې مهم رول لري، په وروستیو میاشتو کې د نړیوالو مالي مرستو د پراخ کمښت او بندېدو له امله له جدي محدودیتونو سره مخ سوي او د دغو پروګرامونو د فعالیت کچه په څرګند ډول راټیټه سوې ده.
اوچا د دغو پروګرامونو د مالي ملاتړ پر دوام ټینګار کړی او ویلي یې دي چې د افغانستان وګړي حق لري په داسې چاپېریال کې ژوند وکړي چې د ماینونو او د جګړې د پاتې نورو چاودېدونکو توکو له ګواښ څخه پاک وي.
ناچاودېدلي مهمات او د لسیزو جګړو پاتې ماینونه لا هم په افغانستان کې د ملکي وګړو، په ځانګړي ډول ماشومانو، د مرګژوبلې له مهمو لاملونو څخه ګڼل کېږي.
د ملګرو ملتونو د شمېرو له مخې، شاوخوا ۳.۳ میلیونه کسان په افغانستان کې د ماینونو او چاودېدونکو توکو له ککړو سیمو سره نږدې ژوند کوي او لا هم له جدي خطر سره مخ دي.
