د دوشنبې ورځې په مازیګر، د سرطان په لومړۍ نېټه، د ۵.۲ تر ۵.۳ درجې پورې یوې زلزلې د افغانستان د شمال ختیځ ځینې سیمې ولړزولې او د کابل په ګډون د یو شمېر سیمو اوسېدونکو یې ټکانونه احساس کړل.
د امریکا د ځمکپوهنې ادارې (USGS) اعلان وکړ چې دغه زلزله د بدخشان ولایت د جرم ولسوالۍ د سوېل لوېدیځ په ۴۲ کیلومترۍ کې د ۵.۲ درجې په ځواک رامنځته سوې ده.
هممهاله، د اروپا ـ مدیترانې د زلزلو د ثبت مرکز (EMSC) د دې زلزلې ځواک ۵.۳ درجې ښودلی او مرکز یې د بدخشان ولایت بللی دی.
د دغه مرکز د راپور له مخې، زلزله د ځمکې په ۱۹۰ کیلومتره ژوروالي کې رامنځته سوې، چې د نسبتاً ژورو زلزلو له ډلې شمېرل کېږي او ټکانونه یې په لیرو سیمو کې هم احساسېدای سي.
د کابل یو شمېر اوسېدونکو ویلي چې د دې زلزلې ټکانونه یې په پلازمېنه کې احساس کړي دي.
