د پروان ولایت د کوهصافي ولسوالۍ په یوه ترافيکي پېښه کې پنځه کسان، چې ښځې او ماشومان هم پکښې شامل دي، مړه سوي او اووه نور ټپیان سوي دي.
په پروان کې د طالبانو امنيه قوماندانۍ اعلان کړی چې دغه پېښه د تېری ورځې په ماښام د کوهصافي ولسوالۍ د منديقول په سیمه کې رامنځته سوې ده.
د طالبانو په وینا، یو فلنکوچ ډوله موټر د تخنیکي ستونزې له امله له اصلي سړک څخه اوښتی او چپه سوی دی.
طالبانو اعلان کړي چې د دې پېښې له امله پنځه کسانو خپل ژوند له لاسه ورکړی او اووه نور ټپیان سوي دي. ټپیان د درملنې لپاره روغتیايي مرکزونو ته لېږدول سوي دي.
د طالبانو چارواکو زیاته کړې چې د پېښې د کره لامل د معلومولو لپاره څېړنې روانې دي.
