سیمهییزې سرچینې راپور ورکوي چې د پاکستان تر ولکې لاندې په کشمیر کې د پراخو اعتراضونو پر مهال لږ تر لږه ۲۴ کسان وژل سوي او سلګونه نور ټپیان یا نیول سوي دي.
د راپورونو له مخې، د اعتراضونو له پراخېدو سره سم سیمهییزو چارواکو مهمې لارې تړلې، د انټرنېټ خدمتونه یې بند کړي او د رسنیو پر فعالیتونو یې محدودیتونه لګولي دي.
دغه اعتراضونه په ټاکنو کې کډوالو ته د ۱۲ څوکيو د ځانګړي کولو د پرېکړې پر ضد پیل سوي او کرار کرار د پاکستان تر ولکې لاندې د کشمیر په بېلابېلو سیمو کې په پراخو ګډوډیو بدل سوي دي.
راپورونه ښايي چې د دولتي ځواکونو او معترضانو ترمنځ د نښتو له امله زرګونو کسانو د سیمې په بېلابېلو برخو کې لاریونونه او اعتراضونه کړي دي.
تر اوسه پاکستاني چارواکو د ټپیانو او نیول سویو کسانو د کره شمېر په اړه نور جزییات نه دي خپاره کړي، خو سیمهییزې سرچینې د تاوتریخوالي د زیاتېدو او په ځینو سیمو کې د اعتراضونو د دوام خبر ورکوي.
