په کونړ ولایت کې سیمهییزې سرچینې وایي چې یوه ۹ کلنه انجلۍ چې سایره نومېده، له سختو شکنجو او شدیدو ټپونو وروسته په بېرحمانه ډول وژل سوې ده.
د دغو سرچینو په وینا، دا ماشومه چې د خپل ماما کور ته د لیدو لپاره تللې وه، د دغه ولایت د نرنګ ولسوالۍ د درهٔ بادیل په سیمه کې د نامعلومو کسانو له خوا تښتول سوې وه او وروسته یې ژوند له لاسه ورکړ.
راپورونه زیاتوي چې د هغې مړی د سخت تاوتریخوالي له نښو سره موندل سوی، په داسې حال کې چې تر اوسه د دې پېښې د عاملانو هویت او انګېزه نه ده روښانه سوې.
د سایرې کورنۍ د اندېښنې په څرګندولو سره له مسوولو ادارو غوښتي چې عاملان وپېژني، ونیسي او د قانون منګولو ته یې وسپاري.
په همدې حال کې، د ماشومانو د حقونو فعالانو د ماشومانو لپاره د لا زیات امنیت د تأمین او د داسې دردناکو پېښو د تکرار د مخنیوي غوښتنه کړې ده.
