سیمهییزې سرچینې وایي چې تېره شپه د کابل نړیوال هوايي ډګر شاوخوا د سپکو او درنو وسلو په وسیله پراخې ډزې سوې دي.
د سرچینو په وینا، دا ډزې د شپې په وروستیو ساعتونو کې پیل سوې او د دوشنبې ورځې د سهار تر ۲:۴۰ بجو پورې یې دوام کړی دی.
تر اوسه د دغو ډزو لامل او موخه نه ده روښانه سوې، او طالبانو هم د دې پېښې په اړه کوم غبرګون نه دی ښودلی.
دا په داسې حال کې ده چې سرچینو تر دې وړاندې د کابل ښار د نهمې او لسمې امنیتي حوزو په اړوندو سیمو کې هم د ډزو د پېښو خبر ورکړی وو.
هممهاله، د کابل یو شمېر اوسېدونکي وایي چې د دغو ډزو دوام هغوی اندېښمن کړي او د ښار د اوسېدونکو د شپې ارام او خوب یې ور خراب کړی دی.
