د معمار خبري آژانس د راپور له مخې، قاري علي محمد مجاهد ، د کابل په پغمان ولسوالۍ کې د طالبانو ولسوال ، وایي چې دا سیمه د کال په بېلابېلو موسمونو کې د افغانستان له بېلابېلو ولایتونو څخه د زرګونو سیلانیانو او لیدونکو هرکلی کوي.
د هغه په وینا، پغمان د خپل زړه راښکونکي هوا، شنو طبیعتونو او بېلابېلو تفریحي ښکلاوو له امله د کابل په شاوخوا کې د مهمو سیاحتي سیمو څخه ګڼل کېږي او هر کال ګڼ شمېر کورنۍ او ځوانان د تفریح او استراحت لپاره دې ولسوالۍ ته سفر کوي.
مجاهد په همدې حال کې ویلي چې یو شمېر لیدونکي د ښاري ژوند له اصولو او د عامه ځایونو د سمې کارونې له طریقې سره کافي بلدتیا نه لري. هغه د ښاري ژوند د کلتور د زدهکړې او د پارکونو، تفریحي ځایونو او نورو عامه ساحو د سمې کارونې پر اړتیا ټینګار کړی دی.
د طالبانو د ولسوال په وینا، د چاپېریال پاک ساتل، د عامه تأسیساتو ساتنه او د تفریحي ځایونو د قوانینو او مقرراتو مراعات هغه موارد دي چې باید د سیلانیانو او لیدونکو ترمنځ لا ډېر عام سي.
هغه زیاته کړې چې سیمهییز مسوولین هڅه کوي د پوهاوي پروګرامونو په زیاتولو او د خلکو په همکارۍ سره د پغمان د مېلمنو او کورنیو لپاره لا مناسب شرایط برابر کړي.
د پغمان ولسوالۍ د کابل ښار په لوېدیځ کې موقعیت لري او د خپلو شنو باغونو، طبیعي تفریحي ځایونو او معتدل اقلیم له امله د افغانستان له پېژندل سویو او ډېرو خوښو سیاحتي سیمو څخه شمېرل کېږي.
