په لغمان ولایت کې د طالبانو سیمه ییزو چارواکو خبر ورکړی چې د دغه ولایت د قرغیو ولسوالۍ په مربوطاتو کې یو ۱۴ کلن ځوان د ډوبېدو له امله خپل ژوند له لاسه ورکړی دی.
په لغمان ولایت کې د طالبانو امنیه قوماندانۍ اعلان کړی چې دغه پېښه د جوزا په ۱۲مه، د سېشنبې په ورځ، د قرغیو ولسوالۍ د عزیزخان په کلي کې رامنځته سوې ده. د راپور له مخې، یاد ځوان د چکر او تفریح لپاره د درونټې سیمې ته تللی وو، خو په اوبو کې د لوبو پر مهال ډوب سوی دی.
د سیمهییزو سرچینو په وینا، د سیمې اوسېدونکي تر هڅو وروسته وتوانېدل چې د دغه تنکي ځوان جسد له اوبو څخه راوباسي او کورنۍ ته یې وسپاري.
دا په داسې حال کې ده چې په وروستیو میاشتو کې د هېواد په بېلابېلو ولایتونو کې د وګړو، په ځانګړي ډول د تنکیو ځوانانو او ځوانانو، د ډوبېدو پېښې زیاتې سوې دي، او په تفریحي او اوبیزو سیمو کې د خوندیتوب د لازمو تدابیرو د نشتوالي په اړه یې اندېښنې راپارولې دي.
