د کابل پوهنتون د انجینرۍ پوهنځي یوه فارغ ځوان ، د بېکارۍ او اقتصادي ستونزو پر وړاندې د اعتراض په توګه ځان ته اور اچولی دی.
دا پېښه د سهشنبې په ورځ، د ثور په ۲۹مه، د کابل ښار په یوه عمومي سړک کې رامنځته سوې ده. د سرچینو په وینا، دغه ځوان د بېکارۍ او سخت اقتصادي وضعیت له امله دې اقدام ته اړ سوی دی.
عیني شاهدانو ویلي چې د سیمې اوسېدونکو پر وخت مرسته کړې او توانېدلي چې نوموړی له مرګه وژغوري.
سرچینې همداراز ټینګار کوي چې په وروستیو میاشتو کې په افغانستان کې اقتصادي بحران زیات سوی او د بېکارۍ کچه، په ځانګړي ډول د ځوانانو او د پوهنتونونو د فارغانو ترمنځ، په څرګند ډول لوړه سوې ده.
