په کابل ولایت کې ولسي سرچینې وايي چې تېر ماښام وسلهوالو کسانو د کابل په لوېدیځ د دشت برچي سیمې په یوه کوڅه کې یو کور ته په ننوتلو سره د سرو زرو او قیمتي توکو یوه اندازه غلا کړې ده.
دغه سرچینې د سهشنبې په ورځ، د ثور په ۲۲مه، ویلي چې څو شپې مخکې هم څلور ناپېژندل سوي وسلهوال د دشت برچي د هاشمي دواخانې په کوڅې کې د یوه دوکاندار کور ته ننوتي وو او د دې پېښې پر مهال یې یو سړی او یوه ښځه سخت ټپیان کړي وو.
د سرچینو په وینا، د تېرې شپې د غلا له پېښې وروسته د سیمې اوسېدونکو له طالبانو سره اړیکه نیولې، خو د دې پر ځای چې ځواکونه واستول سي یا د پېښې د تعقیب لپاره همغږي وسي، له زنګ وهونکي څخه د غلا سویو توکو د جزیاتو پوښتنه سوې ده.
یوې سرچینې ویلي چې طالبانو له هغه څخه د غلا سویو سرو زرو او نورو توکو د اندازې په اړه پوښتنې کړې دي.
په همدې حال کې راپورونه ښايي چې په وروستیو ورځو کې د هېواد په یو شمېر ولایتونو کې د وسلهوالو غلاوو، انسانتښتونو او وژنو پېښې زیاتې سوې دي، چې دغه وضعیت د خلکو اندېښنه د امنیتي وضعیت په اړه لا پسې زیاتوي.
