د غزني ولايت په جاغوري ولسوالۍ کې د سيمې د اوسېدونکو په لګښت يو دوه پوړيزه ښوونيزه ودانۍ جوړه او ګټې اخيستنې ته وسپارل سوه.
د باختر خبري آژانس، چې د طالبانو تر واک لاندې رسنۍ ده، د ثور پر ۱۲مه، د شنبې په ورځ راپور ورکړی چې دا ښوونځی د جاغوري ولسوالۍ د «حيدر» په کلي کې جوړه سوي ده.
د راپور له مخې، د دې ښوونځي د جوړولو لګښت شاوخوا شپږ ميليونه افغانۍ سوی چې د سيمې خلکو برابر کړی دی. د دې نوي جوړ سوي ښوونځي ودانۍ ۱۲ درسي ټولګي، يو اداري خونه او يو کتابتون لري.
په تېرو څلورو کلونو کې د غزني ولايت د بېلابېلو سيمو اوسېدونکو څو ښوونځي په خپلو شخصي لګښتونو او د خلکو په همکارۍ جوړ کړي دي.
دا اقدام په داسې حال کې کېږي چې طالبانو له بيا واک ته رسېدو وروسته د شپږم ټولګي څخه پورته د انجونو زدهکړه او په پوهنتونونو کې د ښځو د زدهکړې دوام بند کړی دی.
