په بدخشان کې سیمهییزې سرچینې وايي چې د طالبانو د ځواکونو ترمنځ د معدني سرچینو، په ځانګړي ډول د بدخشان ولایت د یاوان ولسوالۍ د سرو زرو کانونو د کنټرول پر سر د نښتو له امله سلګونه کورنۍ له بېلابېلو کلیو څخه د خپلو کورونو پرېښودو ته اړ سوې دي.
د دې سرچینو په وینا، شاوخوا یوه اوونۍ وړاندې نښتې پیل سوې او تر اوسه دوام لري.
د دې نښتو په جریان کې څو تنه طالبان وژل سوي او یو شمېر نور ټپیان سوي دي.
د موجودو معلوماتو له مخې، دا نښتې د سرو زرو کانونو د واک پر سر د بېلابېلو طالبانو ډلو ترمنځ رامنځته سوې او په وروستیو ورځو کې یې شدت هم زیات سوی دی.
په ورته وخت کې، د دې ولسوالۍ د «شولیر پایان» د کلي یو شمېر اوسېدونکو د اعتراض په توګه د ناامنۍ د دوام په اړه اندېښنه څرګنده کړې ده. هغوی وايي چې د نښتو زیاتوالي د ملکي وګړو ترمنځ پراخه وېره رامنځته کړې او ډېری کورنۍ، په ځانګړي ډول ښځې او ماشومان، د خپل استوګنځي پرېښودو ته اړ سوې دي.
سیمهییز اوسېدونکي د وضعیت د خرابېدو په اړه اندېښنه څرګندوي او د نښتو د ژر پای ته رسېدو او په سیمه کې د امنیت د ټینګښت غوښتنه کوي.
