د بريتانيا د «آلسیس» څېړنيز بنسټ په يوه تازه راپور کي اعلان سوي چي د طالبانو د بنديز سره سره، په افغانستان کي د کوکنارو کر په ۲۰۲۶ کال کي زيات سوی دی، په ځانګړي ډول په بدخشان ولايت کي، او لا هم د بزګرانو په ژوند کې مهم رول لري.
دغه څېړنه چي د ډيويډ منسفيلډ له خوا تر سره سوې ده، ښايي چي اقتصادي فشارونو ځيني بزګران دې ته اړ کړي چي يا د کوکنارو کر ته دوام ورکړي او يا د نشهيي توکو د توليد لپاره پاکستان ته مهاجرت وکړي.
همدارنګه، سره له دې چي پر مصنوعي نشهيي توکو تمرکز زيات سوی، د ترياکو د زياتو زېرمو او د کر د پراخېدو له امله، اروپا ته د هېروئينو رسونه لا هم دوام لري.
د راپور له مخي، د ۲۰۲۶ کال په پيل کي د ترياکو بيه شاوخوا د هر کيلو لپاره ۵۰۰ امريکايي ډالرو ته رسېدلې ده. په بدخشان کي بزګران د اقتصادي ستونزو او د وچکالۍ له امله د کوکنارو کر په للمي او اوبیزه ځمکو کي زيات کړی دی.
په مقابل کي، په هلمند او ننګرهار ولايتونو کي، چي پخوا د کر مهم مرکزونه وو، د توليد په کچه کي څرګند کمښت ليدل سوی دی. راپور خبرداری ورکوي چي که طالبان د کروندو د له منځه وړلو هڅې سختي کړي، نو په بدخشان کي د تاوتريخوالي د زياتېدو احتمال شتون لري.
