ملګرو ملتونو په افغانستان کې د زلزلې له امله د ویجاړ سوو کورونو د سمدستي او پایدارې بیا رغونې غوښتنه وکړه

د معمار خبري آژانس د راپور له مخې؛ د ملګرو ملتونو د بشري مېشت ځایونو پروګرام د افغانستان په ختیځ کې د زلزلې له امله د ویجاړ سوو کورونو پر هر څومره ژر بیا رغونې ټینګار کړی او ویلي یې دي چې دا ځل باید په داسې بڼه جوړ سي چې د پایښت او د زلزلې پر وړاندې د لا مقاومت وړتیا ولري. دغه دفتر (یک‌شنبه، د میزان ۶مه) په ایکس کې لیکلي چې خلکو هر څه، کورونه، معاش او ډېرو یې خپل ژوند له لاسه ورکړی دی. د ملګرو ملتونو د بشري مېشت ځایونو پروګرام څرګنده کړه: «بیا رغونه باید همدا اوس پیل سي. موږ باید د زلزلې پر وړاندې له پخوا څخه په لا پایداره او لا مقاومت لرونکي ډول، غوره جوړونه وکړو.» استفاني لوز، په افغانستان کې د دې پروګرام مشر، د کونړ ولایت څخه لیدنه کړې چې له زلزلې تر ټولو زیات زیانمن سوی او له زیانمنو کورنیو سره د ملاتړ لپاره یې د سمدستي اقدام غوښتنه کړې ده. نږدې یوه میاشت وړاندې د افغانستان په ختیځ کې یوه زوروره زلزله رامنځته سوه، چې له امله یې له ۲۰۰۰ ډیرو خلکو ژوند دلاسه ورکړ او له ۳۰۰۰ ډیر ټپیان سول. همدارنګه په دې زلزله کې ۵۹۵۰ کورونه ویجاړ سوي او ۱۱۹۵ نور کورونه زیانمن سوي دي.