د ‌۴٫۹ ریښتر په کچې زلزلې ختیځ ولایتونه ولړزول

تیره ورځ سهار (سه‌شنبه، د میزان لومړۍ) د ۴٫۹ ریښتر په کچه زلزلې د افغانستان ختیځې سیمې ولړزولې. د هندوستان د ملي جیولوجۍ مرکز د معلوماتو له مخې، دا زلزله د ځمکې له سطحې ۱۲۰ کیلومتره په ژوروالي کې او د جلال‌آباد ښار په شمال کې رامنځته سوې ده. د جلال‌آباد په ښار او شاوخوا سیمو کې د زلزلې زور په څرګند ډول احساس سوی، خو تر اوسه د احتمالي تلفاتو او زیانونو په اړه کوم راپور نه دی ورکړل سوی. ځایي چارواکي د وضعیت د څېړلو په حال کې دي. د جیولوجۍ کارپوهان وايي، هغه زلزلې چې په ډېره ژوره کې رامنځته کېږي، عموماً په ځمکه د لږو تاوانونو سبب ګرځي.