د کندز ولایت یو شمېر اوسېدونکي وایي چې د دې ولایت روغتیايي مرکزونه د درملو او طبي وسایلو له سخت کمښت سره مخ دي او ډیرو کلینیکونو شاوخوا شپږ میاشتې کېږي چې خپل درملیز زېرمتونونه یې له لاسه ورکړي دي.
د اوسېدونکو په وینا، د دې حالت دوام د درملنې د خدمتونو بهیر، په ځانګړي ډول د اومېندواره ښځو او هغو ناروغانو لپاره چې بېړنۍ پاملرنې ته اړتیا لري، له جدي ستونزو سره مخ کړی دی.
د کندز اوسېدونکي وایي چې د مرستندویو بنسټونو د مرستو له کمېدو او بندېدو وروسته، نه یوازې په ډېرو درملیزو مرکزونو کې درمل نه موندل کېږي، بلکې د لومړنیو روغتیايي وسایلو کمښت هم په څرګنده توګه زیات سوی دی.
د هغوی په ادعا، د طالبانو روغتیايي مسؤلین له موجود حالت څخه خبر دي، خو سره له دې هم اړین درملیز خدمات، په ځانګړي ډول د زیږون او بېړنۍ پاملرنې په برخه کې، لا هم له پراخو خنډونو سره مخ دي.
ځینې سيمهایزې سرچینې خبرداری ورکوي چې د وسایلو او درملو نشتوالی لامل سوی چې یو شمېر ناروغې ښځې د ولسوالیو څخه د ولایت مرکز ته د لېږد پر مهال خپل ژوند له لاسه ورکړي؛ دې موضوع په دې ولایت کې د روغتیايي کړکېچ د انساني پایلو په اړه اندېښنې زیاتې کړي دي.
په افغانستان کې د درملو کمښت په داسې حال کې زیات سوی چې د طالبانو او پاکستاني ځواکونو ترمنځ له وروستیو شخړو وروسته، له پاکستانه د درملو د وارداتو بهیر هم له جدي ستونزو سره مخ سوی؛ دا وضعیت ناروغان، په ځانګړي ډول د اوږدمهالو ناروغیو لرونکي کسان، له لا زیات فشار سره مخ کړي دي.
تر دې مخکې، د طالبانو د عامې روغتیا وزیر نور جلال جلالي هم ټینګار کړی وو چې افغانستان د درملو د برابرولو په برخه کې له جدي ستونزو سره مخ دي.
