په کابل کې د “معشوق شهادت” کتاب د معرفي او د مقاومت د ادبیاتو او د شهید امام په اړه د افغان شاعرانو د همدردۍ د ستاینې مراسم ترسره سول.
د “معشوق شهادت” کتاب د معرفي مراسم، چې د افغان شاعرانو د هغو شعرونو ټولګه ده چې د شهید امام حضرت آیتالله امام خامنهای (ره) په رثا او ستاینه کې لیکل سوي، د علماوو، شاعرانو، د پوهنتون استادانو، فرهنګيانو او د رسنیو د استازو په ګډون د دوشنبې په ورځ د سرطان په ۸مه په کابل کې د ایران اسلامي جمهوریت د فرهنګي دفتر د “فرهنګ او اندیشه” په تالار کې ترسره سول.
په دې مراسمو کې ښاغلي ډاکټر سید روحالله حسینی، په افغانستان کې د ایران د اسلامي جمهوریت فرهنګي سلاکار ، په اسلامي نړۍ کې د امام شهید پر مقام د خبرې په ترڅ کې وویل: “شهید امام د اسلامي امت لپاره یو الهي ډالۍ وه، او د هغه شهادت د اسلامي نړۍ لپاره عزت او شرافت بلل کېږي. د اسلامي نړۍ ډېرو شاعرانو د هغه په اړه شعرونه ویلي دي، خو په دې برخه کې د افغان شاعرانو ونډه ډېره د پام وړ او ارزښتمنه ده. په کابل کې د ایران د اسلامي جمهوریت د فرهنګي دفتر په نوښت، د افغان شاعرانو هغه شعرونه چې د شهید امام په اړه ویل سوي، راټول سوي او د «معشوق شهادت» په نوم په یوه جلا کتاب کې خپاره سوي دي، تر څو دا آثار د معاصر ادبي میراث د یوې برخې په توګه ثبت او تلپاتې سي.”
هغه د دې اثر د خپرېدو ارزښت ته په اشاره وویل: “د ‘معشوق شهادت’ کتاب یو فرهنګي او ادبي پدیده ده چې د ایران او افغانستان ترمنځ د فرهنګي او دیني اړیکو ژوروالی څرګندوي. دا کتاب د ایران او افغانستان د فرهنګي او تمدني ټولنې لپاره یوه ډالۍ ده او د شهید امام په اړه د افغان شاعرانو د احساساتو، باورونو او د درناوي بېلابېلې درجې په ځان کې رانغاړي.”
ډاکټر حسینی د “معشوق شهادت” کتاب له یوې شعري ټولګې څخه پورته وباله او ویې ویل: “دا اثر د شهید امام په اړه ، د افغان ادبي ټولنې د همدردۍ، وفادارۍ او احساساتو یو سند دی او په ښه ډول د آییني شعر او د مقاومت د ادبیاتو ترمنځ اړیکه انځوروي.”
هغه د ملتونو د هویت په ساتنه کې د شعر پر رول ټینګار وکړ او زیاته یې کړه: “شعر د ملتونو تاریخي او فرهنګي حافظه ده او ادبي آثار د هرې ټولنې له تلپاتې فرهنګي سرمایو څخه شمېرل کېږي. د دې کتاب خپرول هم د فارسي ژبې د تمدني حوزې د مقاومت د ادبیاتو د یوې برخې ثبت دی.”
هغه همدارنګه په افغانستان کې د فارسي شعر د روښانه او پخواني تاریخ ته په اشاره سره وویل: “افغانستان د فارسي شعر او ادب له مهمو زانګوګانو څخه ګڼل کېږي او د دې خاورې شاعرانو تل د اسلامي او فرهنګي ارزښتونو په ساتنه کې مهم او څرګند رول لوبولی دی.”
د ایران د اسلامي جمهوریت فرهنګي سلاکار فارسي ژبه د ایران او افغانستان ګډ میراث وباله او زیاته یې کړه: “د دواړو ملتونو دیني، تاریخي، فرهنګي او ژبني مشترکات د فرهنګي همکاریو د پراختیا زمینه برابروي، او فرهنګي ډیپلوماسي د فارسي ژبې او ادب له لارې تر بل هر وسیلې زیات پیاوړې کېږي.”
هغه په خپلو خبرو کې د مقاومت ادبیات د اسلامي نړۍ له مهمو فرهنګي سرمایو څخه وبلل او د شاعرانو او د قلم خاوندانو پر مسؤلیت یې ټینګار وکړ چې د حقیقت په بیان، د قرباني د فرهنګ په ساتنه او راتلونکو نسلونو ته د اسلامي ارزښتونو په لېږدولو کې مهم رول ولوبوي.
ډاکټر حسینی همدارنګه د ایران د اسلامي جمهوریت د فرهنګي دفتر له خوا د ایران او افغانستان ترمنځ د ګډو فرهنګي او ادبي فعالیتونو د ملاتړ یادونه وکړه او د دواړو هېوادونو ترمنځ د فرهنګي همکاریو د پراختیا غوښتنه یې وکړه.
د مراسمو په پای کې د “معشوق شهادت” کتاب د علمي، فرهنګي او ادبي شخصیتونو په حضور سره معرفي سوو. دا اثر د شهید امام په اړه د افغان شاعرانو د شعرونو ټولګه ده چې د مقاومت د فرهنګ د ستاینې، د آییني ادبیاتو د ترویج او د ایران او افغانستان ترمنځ د فرهنګي اړیکو د پیاوړتیا په موخه خپور سوی دی.
حاضرو کسانو د دې کتاب خپرول د معاصر ادبي میراث د ثبت، د مقاومت د ادبیاتو د پیاوړتیا او د دواړو همژبو او همفرهنګه ملتونو ترمنځ د فرهنګي اړیکو د لا ژورولو په برخه کې یو ارزښتناک ګام وباله.
