د معمار خبري آژانس د راپور له مخې، په بدخشان ولايت کې سیمه ایزې سرچینې وایي چې لیلما ، د افغانستان د پېژندل سوي سیمه ایز هنرمند عبدالسلام مفتون مېرمن ، نن د پنجشنبې په سهار په اشکاشم ولسوالۍ کې د ناپېژاندو وسلهوالو په ډزو کې وژل سوې ده.
د ترلاسه سویو معلوماتو له مخې، لیلما د اشکاشم په بازار کې د ښځو لپاره د ځانګړي رستورانت مشري کوله او د خپل کار ځای ته د تګ پر مهال د ناپېژاندو وسلهوالو د ډزو هدف ګرځېدلې ده.
سرچینې وایي چې بریدکوونکي له پېښې وروسته له سیمې تښتېدلي او تر اوسه د دې پېښې انګېزه نه ده روښانه سوې.
د سرچینو په وینا، لیلما د اسماعیلیه مذهب پیرو وه او د پېښې پر مهال یې ماشوم هم ورسره وو.
تر اوسه پوري په بدخشان کې سیمهییزو طالب چارواکو د دې پېښې په اړه رسمي څرګندونې نه دي کړې.
