د معمار خبري اژانس د راپور له مخې ؛ د بلخ پوهنتون يو شمېر محصلان وايي طالبانو د يوه رسمي سند په وېشلو سره هغوی مجبور کړي چې ژمنه وکړي خپل مذهب حنفي ته واړوي. د دغو محصلانو په وينا، په دې ۱۴ مادو ليک کې، د مذهب تر موضوع سربېره، د بڼې او چلند په اړه هم سخت مقررات وضع سوي دي.
د دې سند له مخې، د محصلانو لپاره د ږيرې پرېښودل او د افغاني دوديزو جامو اغوستل لازمي ګرځول سوي، د موسيقۍ اورېدل منع اعلان سوي او له هغوی غوښتل سوي چې د امر بالمعروف قوانين مراعات کړي.
همدارنګه د جامو ډول هم ټاکل سوی او محصلان مکلف سوي چې افغاني جامي واغوندي.
په پوهنتون کې انځور اخيستل او ويډيو ثبتول هم منع اعلان سوي دي.
د دې سند په يوه ماده کې ټينګار سوی چې د افغانستان ډېری خلک د امام ابوحنيفه مذهب پيروي کوي، نو محصل هم د يووالي د ساتلو لپاره بايد همدغه مذهب غوره کړي.
محصلانو په وروستيو ورځو کې د دې سند نسخې رسنيو ته لېږلې او د دغو مقرراتو د تحميل په اړه يې اندېښنه څرګنده کړې ده. د بلخ پوهنتون يوه محصل ويلي چې طالبانو هغوی د دې ژمنليک لاسليکولو ته اړ کړي او که سرغړونه وکړي، د پوهنتون د ايستلو له ګواښ سره به مخ سي.
د دې سند په وروستۍ برخه کې راغلي چې که څوک د هغه مادې مراعات ونه کړي، محصل به شکايت حق ونه لري.
هممهاله، د نورو ولايتونو، لکه بدخشان، څخه هم د مذهب د بدلولو د ورته هڅو راپورونه خپاره سوي دي. تر دې وړاندې، د طالبانو د علماوو شورا په دې ولايت کې اعلان کړی و چې د اسماعيليه مذهب پيروان که سني مذهب ته واوړي، نو مالي انعام او خونديتوب به ترلاسه کړي.
همدارنګه، د طالبانو د جزايي محکمو په اصولنامه کې يوازې د حنفي مذهب پيروان مسلمانان بلل سوي او نور مذهبونه بدعتي ياد سوي دي.
