د معمار خبري آژانس د راپور له مخې؛ نورالدین ترابي ، د طالبانو د حکومت د پېښو پر وړاندې د چمتووالي او مبارزې ادارې مشر ، په افغانستان کې د ملګرو ملتونو د مرستندویه پلاوي (یوناما) د دفتر له مرستیال ، برونو لماریکس ، سره په لیدنه کې له افغانستان سره پرته له سیاسي ملاحظاتو ، د بشري مرستو د دوام غوښتنه کړې.
ترابي په دې لیدنه کې ویلي چې په افغانستان کې د بشري اړتیاوو د پراخوالي له امله نړیوالې مرستې باید دوام ولري او ترڅنګ یې باید په وقایوي او زیربنایي پروژو کې هم پانګونه وسي.
هغه زیاته کړې چې د پېښو پر وړاندې د چمتووالي او مبارزې ادارې تر اوسه نږدې ۴۰۰ پروژې بشپړې کړې دي یا د پلي کېدو په حال کې دي.
په همدې حال کې، ځینو نړیوالو بنسټونو په وروستیو کلونو کې د بشري مرستو د وېش په بهیر کې پر شفافیت، اړمنو وګړو ته پرته له خنډه لاسرسي او د غیرمسلکي لاسوهنو د مخنیوي پر اړتیا ټینګار کړی دی.
د ملګرو ملتونو د بشري چارو د همغږۍ دفتر (اوچا) د راپور له مخې، سږ کال افغانستان ته د بشري مرستو د اړتیا وړ بودیجه یوازې ۱۷ سلنه برابره سوې ده؛ په داسې حال کې چې افغانستان لا هم د اقلیمي بدلونونو د اغېزو پر وړاندې د نړۍ له تر ټولو زیانمنونکو هېوادونو څخه شمېرل کېږي.
