د معمار خبري اژانس د راپور له مخې؛ د ترکیه دفاع وزارت اعلان وکړ چې په مالاتیا ښار کې د S-70 ډوله چورلکې د لوېدو له امله لږ تر لږه څلور پوځیان ووژل شول. دغه وزارت ولیکل چې تر دې دمه د چورلکې د لوېدو لامل نه دی څرګند شوی او څېړنې لا هم روانې دي.
د ترکیه دفاع وزارت په خپل ایکس حساب کې ولیکل چې دا پېښه د پنجشنبې په ماښام د مالاتیا ښار په سویلي څنډه کې د مامانکوی په سیمه کې رامنځته شوې ده. د دغه وزارت په وینا، د دې چورلکې ټول کسان وژل شوي دي.
د دې ولایت د څارنوالۍ دفتر اعلان وکړ چې د چورلکې د لوېدو په اړه یې څېړنې پیل کړې دي. د راپورونو له مخې، د دې ښار درې لوړپوړي څارنوالان دې پېښې ته د رسېدنې لپاره ټاکل شوي دي.
