د معمار خبري اژانس د راپور له مخې؛ د طالبانو پورې تړلو رسنیو راپور ورکړی دی چې په ختیځ کابل کې د نادرخان غونډۍ پر سر د جلالالدین حقاني جومات د جوړولو کار بشپړ شوی او پر لمونځ کوونکو خلاص شوی دی. سراجالدین حقاني، د طالبانو د کورنیو چارو وزیر، دا جومات د خپل پلار جلالالدین حقاني په نوم جوړ کړی دی. دغه جومات د دوه زرو لمونځ کوونکو لپاره ځای لري.
د طالبانو پورې تړلو ځینو رسنیو د جمعې په ورځ، د لړم په ۲۲مه، راپور ورکړ چې د دغه جومات د جوړولو کار له دوو کلونو وروسته بشپړ شو او ګټې اخیستنې ته وسپارل شو.
د طالبانو ځینو چارواکو ولیکل چې دا جومات د ددو میلیونو ډالرو څخه په ډېر لګښت، د سراجالدین حقاني په حکم او تر څارنې لاندې جوړ شوی دی. طالبانو روښانه نه ده کړې چې د دغه جومات بودیجه له کومې سرچینې تأمین شوې ده.
جلالالدین حقاني، د سراجالدین حقاني پلار، د پخوانیو جهادي څېرو له ډلې و. هغه د حقاني شبکې بنسټګر دی.
د طالبانو د حج او اوقاف وزارت ویلي دي چې د روان کال له پیل راهیسې یوازې په کابل ښار کې شاوخوا ۶۰ جوماتونه جوړ شوي او د ۵۰ نورو جوماتونو د ترمیم کار هم بشپړ شوی دی.
