د ترکیه کډوالۍ ادارې نوي شمېرې ښیي چې د دغه هېواد پولیسو د روان میلادي کال په لومړیو ۱۰ میاشتو کې له ۱۲۰ زرو ډېر بهرنۍ اتباع د اوسېدو اسنادو د نشتوالي له امله نیولي دي.
د دغو شمېرو له مخې، ۳۳ زره او ۳۴۱ افغان اتباع د ترکیه په بېلابېلو سیمو کې نیول شوي دي او افغانان د نیول شوو بهرنیانو د شمېر له پلوه په لومړي ځای کې دي.
د افغانستان له اتباعو وروسته، د سوریې، ازبکستان، ترکمنستان، ایران، مراکش، عراق، مصر، سوډان او یمن اتباع په راتلونکو درجو کې ځای لري.
د ترکیه د کډوالۍ ادارې اعلان وکړ چې دا کسان د قانوني او اوسېدو اسنادو د نشتوالي له امله نیول شوي دي.
د ترکیه د کډوالۍ ادارې د نیول شوو کسانو برخلیک او د هغو کسانو شمېر په اړه چې له دغه هېواده ایستل شوي، جزئیات نه دي خپاره کړي. دغې ادارې همدارنګه اعلان کړی دی چې په همدې موده کې ۱۱ زره او ۸۹ کسان د انسانانو د قاچاق په تور نیول شوي دي.
د ترکیه حکومت د هغو بهرنیو اتباعو د شمېر په اړه چې له نیولو وروسته له دغه هېواده ایستل کېږي، څرګندې شمېرې نه خپرېږي. د کډوالو ملاتړو سازمانونو هم تر دې دمه د روان میلادي کال په اوږدو کې له ترکیه ایستل شوو افغان اتباعو د شمېر په اړه باوري شمېرې نه دي وړاندې کړي.
په دې سره سره، ملګرو ملتونو مخکې راپور ورکړی و چې ترکیه روان میلادي کال په لومړیو پنځو میاشتو کې له ۱۳ زرو ډېر افغان اتباع ایستلي دي.
