په دغو ویډیوګانو کې دوه کسان چې ورته جامې یې اغوستې او لاسونه یې تړلي دي، پر ځمکه ناست دي او وسلهوال کسان له شا څخه هغوی ته ډزې کوي.
د افغانستان متحد جبهه، چې د پخواني افغان پوځ د قوماندانانو له ډلې سمیع سادات په مشرۍ ده، په یوه اعلامیه کې ادعا وکړه چې دا دوه کسان د طالبانو لپاره جاسوسۍ پر مهال پېژندل شوي او نیول شوي وو او د دغې ډلې «پوځي محکمې» هغوی ته د اعدام حکم ورکړی و.
دغې جبهې د دغو دوو کسانو د هویت، د نیولو وخت او څرنګوالي او د جاسوسۍ تور د شواهدو په اړه جزئیات نه دي وړاندې کړي. همدارنګه یې روښانه نه کړې چې د دوی قضیې څېړنه او محاکمه څنګه ترسره شوې ده.
د متحد جبهې په خپله اعلامیه کې ویلي دي چې په تېرو څو میاشتو کې یې شپږ کسان د طالبانو لپاره د جاسوسۍ په تور پېژندلي او د خپلې «پوځي محکمې» په محاکمه کې یې اعدام کړي دي.
دغې جبهې همدارنګه هغو کسانو ته چې طالبانو ته معلومات یا تجهیزات ورکوي یا د هغوی له امنیتي، پوځي او استخباراتي ادارو سره همکاري کوي، خبرداری ورکړی دی چې دې همکارۍ ته پای ټکی کېږدي.
