د معمار خبري اژانس راپور له مخې؛ د پاکستان پولیسو چارواکو اعلان کړی چې رابعه احسن، د ۹۲ نیوز خصوصي تلویزیون خبریاله، په راولپنډۍ کې په خپل کور کې د ډزو له امله وژل شوې ده. د راولپنډۍ پولیسو ویلي چې د دې پېښې په اړه څېړنې پیل شوې دي او د دې خبریالې میړه د دې قضیې په تړاو نیول شوی دی.
حسن مشتاق سوخرا، د پولیسو قوماندان، د یکشنبې په ورځ، د لړم په ۱۶مه، رسنیو ته وویل چې د رابعه احسن جسد په راولپنډۍ کې د ادیاله سړک په خپله د خوب خونه کې موندل شوی. هغه زیاته کړه چې لږ تر لږه یوه ګولۍ د دې ښځې د غاړې سیمې ته لګېدلې ده.
د لومړنیو څېړنو له مخې، احسن طاهر خان، د دې خبریالې میړه، ویلي دي چې ګولۍ په ناڅاپي ډول د هغه له ټوپک څخه وتلې ده.
د راولپنډۍ پولیسو اعلان کړی دی چې د ایالت د عدلي طب ادارې ټیم له پېښې ځایه شاهدي راټولوي.
رابعه احسن د ۹۲ نیوز خبري شبکې خبریاله وه. دا په پاکستان کې مشهوره خصوصي رسنۍ په اردو ژبه فعالیت کوي.
پولیسو زیاته کړه چې د وژل شوې میړه د دې پېښې په تړاو نیول شوی او له خونې څخه یو ټوپک هم موندل شوی دی. د عدلي طب ټیمونو هم له جرم ځایه شواهد او اسناد راټول کړي دي.
حسن مشتاق سوخرا، د راولپنډۍ د پولیسو قوماندان، وویل: «موږ ډاډ ورکوو چې د دې پېښې په اړه به بېطرفه څېړنې ترسره شي.»
