حمدالله فطرت ، د طالبانو د ویاند مرستیال اعلان کړی چې ۴۷۷ کورنۍ، چې ۲ زره او ۵۷۹ افغان وګړي پکښې شامل دي، له پاکستان څخه افغانستان ته راستنې سوي دي.
د طالبانو د ویاند مرستیال د دوشنبې په سهار (د سرطان په ۱مه) په خپره کړې خبرپاڼه کې ویلي چې له دې ډلې ۴۰۶ کورنۍ، چې ۲ زره او ۲۵۶ کسان پکښې شامل دي، د تورخم له لارې افغانستان ته داخلې سوې دي.
د خبرپاڼې له مخې، همدارنګه ۳۹ کورنۍ د کندهار د سپین بولدک له پولې، ۲۰ کورنۍ د نیمروز له پولې او ۱۲ کورنۍ د هرات د اسلامکلا له لارې هېواد ته راستنې سوې دي.
دا په داسې حال کې ده چې له پاکستان څخه د افغان کډوالو د جبري ستنولو د بهیر له زیاتېدو سره هممهاله، د راستنېدونکو لپاره د کار، استوګنځي او د ژوند د اړتیاوو اړوند ستونزو د زیاتېدو په اړه اندېښنې هم ډېرې سوې دي.
