د معمار خبري اژانس د راپور له مخې؛ ابوالفضل ابوترابي، د ایران د اسلامي جمهوریت د اسلامي شورا غړي ، د کډوالو د تنظیم د طرحې د عملي اقداماتو د پیل خبر ورکړ او ویلي یې دي چې دا طرحه د ولسي جرګې په علني غونډه کې له تصویب وروسته په ازمایښتي ډول عملي کېږي.
ابوترابي د معلوماتو د ثبت، د ګوتو نښان اخیستلو، د څېرو ثبتولو او د کډوالو د بیمې په څېر اقداماتو ته په اشارې ویلي چې اوس مهال په ایران کې شاوخوا پنځه میلیونه قانوني او غیرقانوني کډوال موجود دي، چې د درې میلیونو او شپږ سوه زرو څخه زیاتو کسانو معلومات ثبت سوي دي.
د ایران د اسلامي جمهوریت د اسلامي شورا دغه غړی زیاته کړه چې د کډوالو د تنظیم د طرحې له مخې به د هغو کسانو وضعیت چې تر ۱۴۰۰ هجري کال مخکې ایران ته داخل سوي دي روښانه او وروستۍ پرېکړه به یې وسي، او د هغوی د کار وضعیت به هم مشخص سي.
ابوترابي همدارنګه ټینګار کړی چې د وروستۍ جګړې په جریان کې د افغانستان د اتباعو لخوا د کومې ورانوونکې کړنې هېڅ مستند راپور نه دی ثبت سوی، او په ډېری مواردو کې کډوالو د ایران له حکومت څخه خپل ملاتړ اعلان کړی دی.
