د معمار خبري اژانس د راپور له مخې؛ د استرالیا حکومت د هرات په ولایت کې د ولسي اعتراضونو د ځپلو او د ښځو د نیولو په اړه د اندېښنې په څرګندولو سره له طالبانو غوښتي چې د افغانستان د وګړو اساسي حقونه مراعت کړي او ټول هغه سیاستونه او اقدامات لغوه کړي چې د ښځو او انجونو د محدودیت او ځپلو سبب ګرځي.
د افغانستان لپارع د استرالیا سفارت د پنجشنبې په ورځ (۲۱ جوزا) په ایکس ټولنیزه شبکه کې په یوه پیغام کې ویلي چې په هرات کې وروستي بدلونونه ډیر اندېښمنونکي دي.
دغه سفارت همدارنګه د افغانستان لپاره د ملګرو ملتونو د مرستندویه پلاوي د دفتر هغه اعلامیه بیا خپره کړې چې په هرات کې د ښځو د نیولو او پر معترضینو د زور کارولو په اړه وه، او د وګړو د حقونو او اساسي آزاديو د درناوي پر اړتیا یې ټینګار کړی دی.
