د افغانستان شنونکې شبکې په خپل تازه راپور کې اعلان کړی چې په برېتانيا کې مېشت زرګونه افغان کډوال د دغه هېواد د کډوالۍ په تګلارو کې د وروستيو بدلونونو له امله له نامعلوم راتلونکي او مبهم حقوقي حالت سره مخ دي.
دې بنسټ د جمعې په ورځ، د حمل په ۲۱مه، خبرداری ورکړی چې د دايمي استوګنې د ترلاسه کولو لپاره د انتظار مودې اوږدېدل او د پناه غوښتنې د منلو د کچې ټيټېدل، د افغان کډوالو د بېبرخلېکې حالت لا سخت کړی دی.
د راپور له مخې، هغه کسان چې په تېرو پنځو کلونو کې په برېتانيا کې د کډوالو په توګه منل سوي، ښايي د حکومت د نويو طرحو له مخې د دايمي استوګنې د ترلاسه کولو لپاره تر شلو کلونو پورې انتظار وباسي.
راپور زياتوي چې دغه بدلونونه د برېتانيا د حکومت د نویو تګلارو په چوکاټ کې پلي سوي، چې موخه يې د کډوالو شمېر کمول او د پناه غوښتنې د نظام بيا کتنه ده.
د افغانستان شنونکې شبکې همدارنګه ويلي چې په افغانستان کې له سياسي بدلونونو وروسته، د دغه هېواد شاوخوا ۳۸ زره وګړي د ARAP او ACRS په څېر بشري پروګرامونو له لارې برېتانيا ته لېږدول سوي وو. د دغو کسانو ډېرو په پيل کې دايمي استوګنه ترلاسه کړې وه، خو اوس دغه لارې تړل سوې دي.
د راپور له مخې، په برېتانيا کې د افغانانو د پناه غوښتنې د منلو کچه له ۲۰۲۲ کال کې شاوخوا ۹۸ سلنې څخه په ۲۰۲۵ کال کې نږدې ۳۴ سلنې ته راکمه سوې ده.
د راپور په بله برخه کې راغلي چې يو شمېر هغه پناه غوښتونکي چې غوښتنې يې رد سوې دي، سره له دې چې د کار اجازه او روښانه قانوني حالت نه لري، بيا هم په برېتانيا کې پاتې دي، ځکه د ايستلو امکان يې نسته. د دې بنسټ په وينا، دغه حالت يو ډول حقوقي بېبرخلېکې رامنځته کړې ده.
په پای کې، دې شبکې ټينګار کړی چې که دا بهير دوام وکړي، په برېتانيا کې به د افغان کډوالو حالت لا پېچلی او راتلونکی به يې نور هم نامعلوم سي.
