طالبان: ۹۱۰ کورنۍ په یوه ورځ کې هېواد ته راستنې سوی دي

د معمار خبري آژانس د راپور له مخې؛ باختر آژانس، چې د طالبانو تر کنټرول لاندې دی، د کډوالو د وزارت په حواله ویلي چې په تېره یوه ورځ کې ۹۱۰ کډوالې کورنۍ له پاکستان او ایران څخه افغانستان ته ستنې سوي دي. د راپور له مخې، ۴۷۰ کورنۍ د تورخم له دروازې، ۲۸۳ کورنۍ د سپین‌بولدک له لارې، ۱۰ کورنۍ د نیمروز د ورېښمو له پل، ۶۶ کورنۍ د هلمند له بهرامچې او ۸۱ کورنۍ د اسلام‌قلعه له لارې هېواد ته ستنې سوي دي. د افغان کډوالو د بېرته ستنېدو بهیر په داسې حال کې زور اخیستی چې نړیوالو سازمانونو تر دې وړاندې خبرداری ورکړی وو، که چېرې پراخ شمېر افغانان بېرته ستانه سي، د افغانستان د ټولنیزو او روغتیایي خدماتو محدود ظرفیت به کافي نه وي. دغو سازمانونو د عاجلو مالي سرچینو د برابرولو غوښتنه کړې او ویلي یې دي چې د ۲۰۲۳ د سپتمبر له میاشتې راهیسې، له ایران او پاکستان څخه تراوسه له ۴ میلیونه زیات افغانان افغانستان ته بېرته ستانه سوي دي.