ریچارډ بینیټ: طالبان باید په نړیواله محکمه کې د ښځو د حقونو د سرغړونې په تور محاکمه شي

په افغانستان کې د بشري حقونو په برخه کې د ملګرو ملتونو ځانګړي استازي ریچارډ بینیټ دغه څرګندونې کړې دي چی د طالبانو له خوا د ښځو او نجونو د حقونو د پراخې سرغړونې له امله د نړۍ هېوادونه باید دغه ډله د عدالت په نړیواله محکمه کې محاکمه کړی. بینیټ وویل، «د طالبانو له خوا د ښځو له حقونو څخه سرغړونې دومره سیستماتیک، پراخې او ناوړه دي چې د بشریت پر ضد جرم او جنګي جنایت ګڼل کیدای شي.» هغه د طالبانو له خوا د افغان ښځو د تبعیض، تاوتریخوالی او ځورونې په اړه ګڼو راپورونو ته په اشارې سره ټینګار وکړ: “د طالبانو دا کړنې نه یوازې د افغان ښځو حقونه تر پښو لاندې کوي، بلکې په افغانستان او ټوله سیمه کې سولې او ثبات ته هم زیان رسوي.” بینیټ د نړۍ له هیوادونو وغوښتل چې د عدالت نړیوالې محکمې ته د شواهدو په وړاندې کولو سره د طالبانو په محاکمه کې مرسته وکړي.