د طالبانو د لومړي وزیر مرستیال: موږ ژمن یو چې خلکو ته معیاري روغتیايي خدمات وړاندې کړو

د معمار پرس د خبر له مخې: د طالبانو د ادارې مرستیال عبدالسلام حنفي دغه څرګندونې په کابل کې د جمهوريت د روغتون له فعالیتونو او پرمختګونو څخه د لیدنې پر مهال وکړې او وویل چی اوسنی حکومت ژمن او هوډ لري چې د افغانستان خلکو ته معیاري روغتیايي خدمات وړاندې کړي. حنفي وویل: “د دې په پام کې نیولو سره چې متخصص، تجربه لرونکي او بااحساسه ډاکټران د جمهوريت د روغتون د چارو په سر کې دي، تمه کیږي چې د یاد شوي روغتون کاري بهیر به په ښه توګه ترسره شي.” دا په داسې حال کې ده چې په افغانستان کې د طالبانو د واکمنۍ وروسته په هېواد کې د روغتیا په برخه کې د ننګونو د زیاتېدو راپورونه ورکړل شوي دي. په دې ترڅ کې د طالبانو روغتیايي چارواکو په وار وار له افغانستان سره د روغتیا په برخه کې د نړیوالې ټولنې د همکارۍ غوښتنه کړې ده