طالبانو د هرات – غور د سړک د جوړولو د کار د پیل اعلان وکړ

د معمار پرس د خبر له مخې؛ د هرات – غور سړک د جوړولو کار نن (دوشنبه د ثور ۱۰مه) د لومړي وزیر د اقتصادي مرستیال عبدالغني برادر او یو شمېر نورو طالب چارواکو په حضور کې پیل شو. عبدالغني برادر د دغه سړک د جوړولو د پيل په مراسمو کې وويل: “دا سړک د افغانستان یوه له مهمو او ملي پروژو څخه ده چې د ځمکني ترانسپورت له لارې د هرات، غور، بامیان، دایکندي او میدان وردګ ولایتونه له کابل سره نښلوي.” هغه زياته کړه، د دې سړک په اوږدو کې د مالګې او مرمر ډبرو کانونه شته، چې په بشپړېدو سره به يې د سوداګرۍ او ترانزيت په برخه کې مهم رول ولوبوي.