د لوړو زده کړو وزارت سرپرست: د پوهنتونونو استادان دې د غربيانو د فکري جګړې پر وړاندې مبارزه وکړي

د لوړو زده کړو وزارت سرپرست مولوي ندا محمد نديم کندهار ولایت ته د خپل کاري سفر په ترڅ کې د هېواد سویل لوېدیځ زون د دولتي او خصوصي تحصیلي بنسټونو له مشرتابه او استادانو سره مشورتي ناسته وکړه.
نوموړي په دغه ناسته کې د تحصیلي بنسټونو مشرتابه او استادان د اسلامي امارت د فرمانونو د عملي کولو ملاتړ ته را وبلل او له هغوی څخه یې وغوښتل چې د غربیانو د فکري او تبلیغاتي جګړې پر وړاندې مبارزه وکړي.
سرپرست وزير زياته کړه، چې موږ باید د روغتیا، ټکنالوژۍ، انجنیري او نور عصري علومو په ډګر کې پر ځان بسیا او د پردیو له احتیاج څخه را ووځو.
نوموړي پر مسلکیتوب د ټینګار تر څنګ، د یاد زون استادانو ته د هغوی د ستونزو د حل کولو ډاډ ورکړ.
د هېواد سويل لوېدیځ زون د دولتي او خصوصي تحصیلي بنسټونو مسؤلینو د تحصیلي نظام د پیاوړتیا او پرمختګ په برخه کې د لوړو زده کړو وزارت له سرپرست سره خپلې مشورې شریکې کړې او ډاډ یې ورکړ، چې په خپل ټول توان سره به د هېواد د ځوان نسل د سالمې روزنې لپاره هڅې وکړي