اسلام آباد: له کابل سره اړیکې په افغانستان کې د ټي ټي پي سره په چلند پورې مشروطې دي

د معمار پرس د خبر له مخې؛ د پاکستان د بهرنیو چارو وزارت ویاند شفقت علي خان اعلان وکړ چې د افغانستان په خاوره کې د تحریک طالبان پاکستان (TTP) د پټنځایونو شتون او فعالیت د اسلام آباد او طالبانو ترمنځ د اړیکو په برخه کې یو له اصلي خنډونو څخه دی. هغه ټینګار وکړ چې تر هغه چې دا مسله حل نشي، د دواړو هیوادونو ترمنځ دوه اړخیزه همکاري به عملي نشي. هغه د جمعې په ورځ، د دلو په ۲۶مه په یوه مطبوعاتي کنفرانس کې وویل: “افغانستان د پاکستان ګاونډی دی، خو یوه له هغو مهمو مسلو څخه چې زموږ اړیکې یې ترینګلې کړې دي، په افغانستان خاوره کې د تحریک طالبان پاکستان سره تړلو ترهګرو شتون دی.” د پاکستان د بهرنیو چارو وزارت ویاند ټینګار وکړ چې دا مسله د دواړو هیوادونو ترمنځ په اړیکو کې یو له مهمو ننګونو څخه ده. برعکس، طالبانو تل دا تورونه رد کړي دي.