طالبانو په افغانستان کې د انساني قاچاق د مخنیوي لپاره څلور کلن پلان اعلان کړ

د معمار پرس د خبر له مخې؛ د طالبانو د کورنیو چارو وزارت ویاند عبدالمتین قانع په افغانستان کې د انساني قاچاق د مخنیوي لپاره د یوه پلان د چمتو کولو اعلان وکړ. قانع اعلان وکړ چې دا پلان به د څلورو کلونو لپاره عملي شي او موخه یې د افغان قاچاقبرو په ځانګړې توګه د هغو کسانو نیول دي چې په بهر کې ژوند کوي. قانع زياته کړه چې له کوربه هېوادونو لکه ايران او پاکستان سره يې داسې تدابير نيولي چې قاچاقبرو يې ونيول شي او بېرته افغانستان ته ولېږدول شي. هغه دا هم وويل چې د دغو کسانو ډېرى په ګاونډيو هېوادونو کې مېشت دي. دغه طالب چارواکي ټینګار کړی، چې شاوخوا ۱۱ ورځې مخکې د طالبانو مشر د یوه حکم په صادرولو سره د انسان قاچاق غیر قانوني بللی او له عاملینو سره یې د پرېکنده اقدام غوښتنه کړې ده.