د طالبانو د روغتیا وزارت یو چارواکی په ترافیکي پیښه کې وژل شوی دی

د معمار پرس د خبر له مخې؛ له ولايتونو سره د طالبانو د عامې روغتيا وزارت د همغږۍ مسوول او د کاپيسا ولايت لپاره د دې ډلې د والي ورور حاجي توريال له دوو نورو کسانو سره په يوه ترافيکي پېښه کې ووژل شو. د طالبانو د روغتیا وزارت د سه شنبې په ورځ (د جدي ۱۱مه) د یوې خبرپاڼې په خپرولو سره تایید کړه چې دا پېښه د دوشنبې په ورځ د سمنګان ولایت د خُلم ولسوالۍ په تنګي تاشقرغان سیمه کې شوې ده. د راپورونو له مخې د حاجي توریال موټر د شمال په لویه لاره له یوه بل موټر سره ټکر کړی چې له امله یې نوموړی او دوه ملګري یې وژل شوي دي.