کرزی: د افغانستان د پرمختګ او سوکالۍ لپاره د نجونو زده کړه اړینه ده

پخواني ولسمشر حامد کرزي د نجونو د ښوونځیو او پوهنتونونو د بیا پرانستلو د غوښتنې په غبرګون کې له دې غوښتنې خپل ملاتړ اعلان کړ. د معمار پرس د خبر له مخې؛ ښاغلي کرزي د شنبې په ورځ (د جدي په لومړۍ نېټه) په ایکس (پخواني ټویټر) کې په یوه پوسټ کې لیکلي چې دی دا غوښتنه یو اساسي حق ګڼي او ټینګار کوي چې د نجونو له زده کړو پرته افغانستان روښانه راتلونکې نه شي ترلاسه کولای. هغه څرګنده کړه، ساینس او ​​پوهې ته د نجونو لیوالتیا او غږ د یو سوکاله افغانستان اصلي غږ دی. پخواني ولسمشر وویل: پوهنه د ځوان نسل د پیاوړتیا، د ټولنې د پر ځان بسیاینې، له فقر څخه د خلاصون او د پرمختګ او سوکالۍ یوازینۍ لار ده.