طالبان او چینايي چارواکي د اقتصادي او سیاسي اړیکو پر پراختیا ټینګار کوي

د طالبانو حکومت اعلان کړی چی د طالبانو د صدراعظم د دفتر سیاسي مرستیال مولوي عبدالکبیر نن (شنبه) د افغانستان لپاره د چین له ځانګړي استازي یوشیایونګ او په کابل کې د دغه هېواد له سفیر جاوشینګ او ورسره ملګري پلاوي سره وکتل. په دې کتنه کې د چین ځانګړي استازي وویل، هېواد یې غواړي له افغانستان سره خپلې اړیکې ښې کړي او اقتصادي همکارۍ زیاتې کړي. د افغانستان لپاره د چین ځانګړي استازي د افغانستان، پاکستان او چین ترمنځ د اړیکو پر ښه والي او د تفاهم پر رامنځته کولو د ټینګار په ترڅ کې وویل چې په تېرو درېیو کلونو کې په افغانستان کې د پام وړ پرمختګونه شوي دي. یوشیایونګ د افغانستان ځمکنۍ بشپړتيا، ارزښتونو او خپلواکۍ ته د درناوي په ترڅ کې وويل، چين هڅه کوي چې په افغانستان کې د پانګونې په پراخولو سره د افغانستان د اقتصادي پياوړتيا په برخه کې ونډه واخلي.