د افغانستان او ترکمنستان د سوداګرۍ خونې له خوا څو سوداګریز تړونونه لاسلیک شول

د معمار پرس د خبر له مخې، د افغانستان او ترکمنستان د سوداګرۍ او صنایعو خونې پرون (دوشنبه د ثور ۱۷مه) په هرات کې د یوې غونډې په ترڅ کې له لسو څخه زیات تړونونه او دوه یادداشتونه لاسلیک کړل. د طالبانو د سوداګرۍ وزارت په خبرپاڼه کې راغلي چې دغه تړونونه د ساختماني توکو لپاره دي چې په کې د ګول سیخ، د ترمیم رنګ، مرمر ډبرو او خوراکي توکو شامل دي. سرچينه زياتوي، چې اوس د افغانستان او ترکمنستان ترمنځ د سوداګريزو اړيکو د پراختيا لپاره ښه فرصت دى او بايد دواړه لوري ترې پوره ګټه پورته کړي. د يادونې وړ ده، چې ترکمنستان په تېرو دوو کلونو کې په افغانستان کې په بېلابېلو برخو کې پانګونه کړې او د دغه هېواد چارواکو په وار وار له طالب چارواکو سره په ليدنو کې د اړيکو د پراختيا غوښتنه کړې ده.