د ازبکستان د بهرنیو چارو وزارت اعلان کړی چې دغه هېواد له ۲۹۰ ټنو څخه ډېرې بشري مرستې افغانستان ته استولې او د حیرتان په بندر کې یې د طالبانو مسؤلینو ته سپارلې دي. د دې وزارت د خبرپاڼې له مخې، په دې مرستو کې خوراکي توکي شامل دي او موخه یې د افغانستان د خلکو ملاتړ او د دواړو هېوادونو ترمنځ د اړیکو پیاوړتیا ده.
د ازبکستان د بهرنیو چارو وزارت وايي چې دا بشري اقدام د تاشکند ژمنتیا څرګندوي چې له ګاونډیو هېوادونو سره مرسته وکړي او په سیمه کې ثبات او همکاري پیاوړې کړي.
ازبکستان که څه هم د طالبانو اداره په رسمیت نه پېژني، خو له طالبانو سره پراخې سیاسي او اقتصادي اړیکې لري.
د ازبکستان او طالبانو چارواکو مخکې ویلي وو چې دواړه لوري غواړي په راتلونکو پنځو کلونو کې خپلې سوداګریزې اړیکې تر ۵ میلیارده ډالرو پورې لوړې کړي.
