افغانستان او ترکمنستان د اورګاډي پټلۍ د پراختیا لپاره د ۷ ملیون ډالرو په ارزښت موافقه وکړه

د معمار پرس د خبر له مخې؛ د طالبانو د فواید عامې وزارت د ترکمنستان د اورګاډي ادارې سره د دواړو هېوادونو ترمنځ د اورګاډي د پټلیو د پراختیا لپاره د دریو تفاهم لیکونو د لاسلیک اعلان کړی دی. د طالبانو د فواید عامې وزارت په دوام کې ویلي چې د طالبانو د اورګاډي د څانګې مرستیال محمد اسحاق صاحبزاده د یوه پلاوي په مشرۍ ترکمنستان ته سفر وکړ او د دې سفر په جریان کې یې د دواړو هېوادونو ترمنځ د ۷ ملیون ډالرو په ارزښت یو تړون لاسلیک کړ. د فواید عامې وزارت ویاند محمد اشرف حق شناس هم اعلان کړی چې په دې تړون کې د اورګاډي د پټلۍ د پراختیا په برخه کې درې مهمې پروژې په شمول د هرات-تورغنډۍ د اورګاډي سټیشن پراختیا، د آقینه-اندخوی د اورګاډي د پټلۍ د پاتې ۱۰ کیلومتره بشپړول، او د اندخوی-شبرغان د ۵۵ کیلومتره اورګاډي پټلۍ مطالعه او ډیزاین شاملې دي.