طالبانو او ازبکستان د پیسو لیږد او بانکي او مالي همکاریو په اړه خبرې وکړې

د معمار پرس د خبر له مخې؛ د طالبانو تر کنټرول لاندې د افغانستان د مرکزي بانک رییس نور احمد آغا، تاشکند ته د طالبانو د پلاوي د سفر په جریان کې د ازبکستان د مرکزي بانک رییس تیمور اشمتوف سره ولیدل او خبرې اترې یې وکړې. د طالبانو تر کنټرول لاندې د افغانستان مرکزي بانک د یکشنبې په ورځ، د حوت په ۵مه اعلان وکړ چې د غونډې په جریان کې، دواړو خواوو د بانکدارۍ او مالي همکارۍ د پراختیا، د مالي لیږدونو د اسانتیا او په سوداګریزو معاملو کې د ملي اسعارو د کارولو په اړه بحث وکړ. همدارنګه، د تادیاتو سیسټمونو نښلول او پراختیا او د بانکي ظرفیتونو پیاوړتیا د دواړو هیوادونو د چارواکو ترمنځ د بحث وړ نورې موضوعګانې وې.