طالبان: افغانستان د چرګانو د غوښې په تولید کې پر ځان بسیا شوي دي

د معمار پرس د خبر له مخې؛ د طالبانو د صنعت او سوداګرۍ وزارت اعلان کړی چې افغانستان د چرګانو د غوښې د تولید په برخه کې پر ځان بسیا شوی دی. د طالبانو د صنایعو او سوداګرۍ وزارت د راپور له مخې په ټول هېواد کې د چرګانو څه باندې ۱۰ زره فارمونه فعال دي. او په کال کې له ۳۰۰۰۰۰ ټنو څخه زیات د چرګانو غوښه تولیدیږي چې کورني بازار ته وړاندې کیږي. په داسې حال کې چې د چرګانو د غوښې په تولید کې پر ځان بسیا کېدل د افغانستان لپاره یوه مهمه لاسته راوړنه ده، يو شمېر فارم لرونکي له دولت څخه غوښتنه کړي دي چې د دغه محصول د صادراتو لپاره دې لازم شرايط برابر کړي، تر څو بهرنۍ بازارونه وګټي او د هېواد په عايداتو کې زياتوالى راشي.