د چین لومړنی سوداګریز اورګاډی افغانستان ته داخل شو

د معمار پرس د خبر له مخې؛ د طالبانو د صنایعو او سوداګرۍ وزارت اعلان کړی، چې د اورګاډي له لارې یو سوداګریز بار مستقیم له چین څخه بلخ ولایت ته رسېدلی دی. د صنعت او سوداګرۍ وزارت نن (شنبه د قوس ۳مه) په خپله خبرپاڼه کې ویلي چې د مالونو دغه لویه بار په ۵۵ کانټینرونو کې له چین څخه بار شوې وه او د قزاقستان او ازبکستان له لارې د بلخ ولایت مزارشریف ښار ته داخله شوه. د يادونې وړ ده، چې دغه بار وړونکې اورګاډي په شاوخوا ۲۲ ورځو کې افغانستان ته رسېدلې دي. د افغانستان د سوداګرۍ او صنایعو وزارت وايي، دغه ریل ګاډی به د افغانستان صادراتي توکي نورو هېوادونو ته ولېږدوي. د چین او افغانستان ترمنځ د اورګاډي تګ راتګ په ۱۳۹۵ کال کې پیل شو. افغانستان د ازبکستان او قزاقستان له لارې له چین سره د اورګاډي له کرښې سره وصل دی.