له اروپايي ټولنې سره د کډوالو د ستونزو په اړه د طالب چارواکو خبرې

د کډوالو او راستنیدونکو چارو وزارت سرپرست خلیل الرحمن حقاني په افغانستان کې د اروپايي ټولنې له سفیر سره په کتنه کې په ګاونډیو او اروپايي هېوادونو کې د افغان کډوالو پر ګڼو ستونزو ټینګار وکړ. په دې کتنه کې دواړو لورو په پاکستان او ایران کې د افغان کډوالو د وضعیت، له جرمني او نورو اروپايي هېوادونو څخه د افغان کډوالو د اجباري اخراج، په افغانستان کې د داخلي بې ځایه شویو د دوامدار ادغام او په دې برخه کې د لازیاتو مرستو په ترلاسه کولو خبرې وکړې. د اروپايي ټولنې سفیر هم د پناه غوښتونکو د ستونزو د حل پر اهمیت ټینګار وکړ او ویې ویل چې دا مساله د هر چا ګډ کار دی. نوموړي دغه راز له افغان کډوالو سره د مرستې لپاره د اروپايي ټولنې هڅې وستایلې.