په متحده عربي اماراتو کې د الکترونیکي تذکرو د وېش مرکز پرانیستل شو

د معمار پرس د خبر له مخې، د طالبانو د احصایې او اطلاعاتو ملي ادارې نن یکشنبه د وږي ۱۷ مه اعلان وکړ چې په متحده عربي اماراتو کې د برېښنايي تذکرو د وېش مرکز پرانیستل شوی دی. د احصایې د ملي ادارې په خبرپاڼه کې راغلي، چې دغه مرکز په ابوظبۍ کې مېشتو افغانانو ته د لا ډېرو اسانتیاوو د برابرولو په موخه جوړ شوی دی. په همدې حال کې په متحده عربي اماراتو کې د طالبانو سفیر بدرالدین حقاني د دغه مرکز د پرانیستې په مراسمو کې وویل چې دوی په دې برخه کې هر ډول همکارۍ ته چمتو دي. د طالبانو د احصایې او اطلاعاتو ریاست د سږني کمپاین په لړ کې ویلي و چې په ۱۴۰۲ کال کې یې په افغانستان کې درې میلیونه او ۱۲۴ زره کسانو ته د زیږون برښنایي تذکرې وېشلي دي.