د معمار خبري آژانس د راپور له مخې، د امام رضا(ع) د سپېڅلي حرم د قدس انګړ تېره شپه د افغان کډوالو او زیارتکوونکو د دودیزو عزادارۍ مراسمو کوربه وو؛ هغه مراسم چې د اهلبیت(ع) د مینهوالو په پراخ ګډون او له غم او درناوي څخه په ډکه فضا کې ترسره سول.
د مراسمو له پیل څخه څو ساعته وړاندې، د افغان کډوالو او زیارتکوونکو بېلابېلې ډلې د تورو او شنو بیرغونو په لرلو سره د قدس په انګړ کې راټولې سوې او د امام حسین(ع) د پاڅون د یاد او پیغام د درناوي لپاره یې عزاداري وکړه.
په دغو مراسمو کې نوحهویلو، مرثیهلوستلو او د اهلبیتو(ع) د مصیبتونو یادولو د رضوي حرم فضا له معنوي احساساتو ډکه کړه. افغان عزادارانو هم د خپلو ځانګړو دودیزو او فرهنګي لارو چارو له مخې، د سینهوهلو د کړیو او په فارسي ژبه او د افغانستان په سیمهییزو لهجو د نوحو په ویلو سره، د سیدالشهدا(ع) په غم کې ګډون وکړ.
د دغو مراسمو تنظیموونکو ویلي چې د ورته پروګرامونو موخه د دیني دودونو ساتنه، د افغان کډوالو ترمنځ د فرهنګي او دیني اړیکو پیاوړتیا او د عاشورا د فرهنګ ژوندي ساتل دي.
د افغان کډوالو د عزادارۍ مراسم هر کال په رضوي حرم کې د زرګونو زیارتکوونکو او کډوالو په ګډون ترسره کېږي او د مشهد مقدس د محرم د ورځو له مهمو او ځانګړو پروګرامونو څخه شمېرل کېږي.
