د معمار خبري آژانس د راپور له مخې؛ د روغتیا نړیوال سازمان په افغانستان کې د تمباکو له استعمال پرته د نړیوالې ورځې په مناسبت اعلان کړی چې د افغانستان د وګړو ساتنه د تمباکو له استعمال څخه یو ګډ مسؤلیت دی او د ټولو همکارۍ ته اړتیا لري.
دغه سازمان د یکشنبې په ورځ، د جوزا په ۱۰مه، په خپل رسمي اېکس پاڼه کې د یو پیغام په خپرولو سره لیکلي چې د تمباکو صنعت هڅه کوي د خپلو مرګژوبلو او خطرناکو محصولاتو زیانونه د دوکه کوونکو تکتیکونو او زړه راښکوونکو خوندونو تر شا پټ کړي.
د روغتیا نړیوال سازمان له افغانانو غوښتنه کړې چې د لوګي څخه پاکو چاپېریالونو ملاتړ او د عامه پوهاوي په زیاتولو سره د تمباکو د استعمال د کمولو او د ټولنې د روغتیا د ساتنې لپاره هڅې وکړي.
په همدې حال کې، په افغانستان کې د روغتیا نړیوال سازمان استازي، ادوین سېنزا ویلي چې د تمباکو صنعت د تبلیغاتي طریقو او ظاهري جذابیتونو افشا کول د افغانستان لپاره د سالم راتلونکي د ټاکلو معنا لري.
هغه زیاته کړې: «د تمباکو له استعمال څخه د افغانستان د وګړو ساتنه یو ګډ مسؤلیت دی.»
د تمباکو له استعمال پرته نړیواله ورځ هر کال د مې میاشتې په ۳۱مه لمانځل کېږي. د روغتیا نړیوال سازمان دغه ورځ د دې لپاره لمانځې چې د تمباکو د استعمال د زیانونو په اړه پوهاوی زیات کړي او حکومتونه د تمباکو د استعمال د کمولو سیاستونو عملي کولو ته وهڅوي.
