د افغانستان د والیبال لوبغاړو بنګله دېش ته ماتې ورکړه

د معمار پرس د خبر له مخې؛ د افغانستان د والیبال ملي ټیم چې پرون یې د ازبکستان ملي ټیم ته ماتې ورکړې وه، نن د سریلانکا په کولمبو ښار کې د بنګله دیش له ټیم سره مخامخ شوه او د ۳-۰ په پرېکنده نتیجه یې وګټله. په دې لوبه کې د افغانستان لوبغاړو په ترتیب سره د ۱۵-۲۵، ۱۹-۲۵ او ۲۲-۲۵ پایلې سره له لومړۍ څخه تر درېیمې سیټونه وګټل. دا د مرکزي اسیا زون د والیبال دوهم پړاو سیالۍ دي چې د سریلانکا په کولمبو کې ترسره کیږي. په دې سیالیو کې د افغانستان، سریلانکا، بنګله دېش، سعودي عربستان، نیپال او ازبکستان لوبډلې ګډون لري.